Интернет Собор / Internet Sobor 
truth and dignity 
АКТУАЛЬНЫЕ НОВОСТИ

РПЦЗ: Чин воскресной обедницы для мирян (проект)

Предлагается для рассмотрения и обсуждения чин воскресной обедницы для мирян, там, где нет священника.


Обедница воскресная для мирян

(по особому чину)

Если нет часов, то начало обычное.

Антифон 1-й (Псалом 102-й).

Хор: Благослови́, душе́ моя́, Го́спода, / благослове́н еси́ Го́споди.

Благослови́, душе́ моя́, Го́спода, / и вся вну́тренняя моя́ / и́мя свято́е Его́. Благослови́, душе́ моя́, Го́спода, / и не забыва́й всех воздая́ний Его́: очища́ющего вся беззако́ния твоя́, / исцеля́ющего вся неду́ги твоя́, избавля́ющего от истле́ния живо́т твой, / венча́ющего тя ми́лостию и щедро́тами, / исполня́ющаго во благи́х жела́ние твое́. / Обнови́тся я́ко о́рля ю́ность твоя́. Щедр и ми́лостив Госпо́дь, / долготерпели́в и многоми́лостив. Сла́ва Отцу́ и Сы́ну, и Свято́му Ду́ху, / и ны́не и при́сно, и во ве́ки веко́в. Ами́нь. / Благослови́, душе́ моя́, Го́спода / и вся вну́тренняя моя́, / и́мя свято́е Его́. // Благослове́н еси́, Го́споди.

Если нет певчих, чтец: Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ в век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Яко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Якоже ще́дрит оте́ц сы́ны, уще́дри Госпо́дь боя́щихся Его́. Яко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси Ангели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чествия Его́, благослови́, душе́ моя́, Го́спода.

Антифон 2-й (Псалом 145-й и "Единородный Сыне").

Хор: Сла́ва Отцу́ и Сы́ну, и Свято́му Ду́ху: Хвали́, душе́ моя́, Го́спода:/ восхвалю́ Го́спода в животе́ мое́м,/ пою́ Бо́гу моему́ до́ндеже есмь./ Не наде́йтеся на кня́зи, на сы́ны челове́ческия,/ в ни́хже нет спасе́ния./ Изы́дет дух его́ и возврати́тся в зе́млю свою́;/ в тот день поги́бнут вся помышле́ния его́./ Блаже́н, ему́ же Бог Иа́ковль помо́щник его́,/ упова́ние его́ на Го́спода Бо́га своего́,/ сотво́ршаго не́бо и зе́млю,/ мо́ре, и вся я́же в них:/ храня́щаго и́стину в век,/ творя́щаго суд оби́димым,/ даю́щаго пи́щу а́лчущим./ Госпо́дь реши́т окова́нныя,/ Госпо́дь умудря́ет слепцы́,/ Госпо́дь возво́дит низве́рженныя,/ Госпо́дь лю́бит пра́ведники./ Госпо́дь храни́т прише́льцы,/ си́ра и вдову́ прии́мет,/ и путь гре́шных погуби́т./ Воцари́тся Госпо́дь во век,// Бог твой, Сио́не, в род и род.

И ны́не и при́сно, и во ве́ки веко́в. Ами́нь./ Единоро́дный Сы́не и Сло́ве Бо́жий, безсме́ртен Сый,/ и изво́ливый спасе́ния на́шего ра́ди/ воплоти́тися от Святы́я Богоро́дицы и Присноде́вы Мари́и,/ непрело́жно вочелове́чивыйся,/ распны́йся же Христе́ Бо́же, сме́ртию сме́рть попра́вый,/ Еди́н Сый Святы́я Тро́ицы,// спрославля́емый Отцу́ и Свято́му Ду́ху, спаси́ нас.

Антифон 3-й (Заповеди Блаженства).

Если нет хора, читает чтец.

Хор: Во ца́рствии Твое́м / помяни́ нас, Го́споди, егда́ прии́деши во ца́рствии Твое́м.

Блаже́ни ни́щии ду́хом, / я́ко тех есть Ца́рство Небе́сное.

Блаже́ни пла́чущии, / я́ко ти́и уте́шатся.

Блаже́ни кро́тцыи, / я́ко ти́и насле́дят зе́млю.

Блаже́ни а́лчущии и жа́ждущии пра́вды, / я́ко ти́и насы́тятся.

Блаже́ни ми́лостивии, / я́ко ти́и поми́ловани бу́дут.

Блаже́ни чи́стии се́рдцем, / я́ко ти́и Бо́га у́зрят.

Блаже́ни миротво́рцы, / я́ко ти́и сы́нове Бо́жии нареку́тся.

Блаже́ни и́згнани пра́вды ра́ди, / я́ко те́х есть Ца́рство Небе́сное.

Блаже́ни есте́ е́гда поно́сят вам, / и иждену́т, и реку́т всяк зол глаго́л на вы лжу́ще Мене́ ра́ди.

Ра́дуйтеся и весели́теся, / я́ко мзда ва́ша мно́га на небесе́х.

Чтец: Мироно́сицы ко гро́бу прише́дша, Ангела зову́ща слы́шаху: Христо́с воскре́се, просвети́вый вся́ческая.

Хор: Ра́дуйтеся и весели́теся, я́ко мзда ва́ша мно́га на Небесе́х.

Чтец: На дре́ве кре́стнем пригвозди́вшагося, и мир от пре́лести изба́вльшаго, согла́сно вси Христа́ воспои́м.

Хор: Сла́ва Отцу́ и Сы́ну, и Свято́му Ду́ху:

Чтец: Отца́, и Сы́на славосло́вим, и Ду́ха Свята́го, глаго́люще: Тро́ице Свята́я, спаси́ ду́ши на́ша.

Хор: И ны́не и при́сно, и во ве́ки веко́в. Ами́нь.

Чтец: Неизрече́нно в после́дняя заче́нши, и ро́ждши созда́теля Твоего́, Де́во, спаса́й Тя велича́ющия.

Tропари и Кондаки

Поются (или читаются если нет певчих) тропари и кондаки воскресные гласа (указаны в конце этого последования), или праздника, и храму, в котором служат.

Примечание: По уставу тропари и кондаки поются в таком порядке: сначала поются все тропари, а потом за ними все кондаки. Перед предпоследним кондаком всегда поется "Слава", а перед последним кондаком поется "И ныне". Последним поется всегда кондак Богородичен, или же Кондак предпразднства или праздника.

Порядок этого пения таков: на первом месте поется тропарь в честь Господа; поэтому там, где храм посвящен Господу, поется прежде всего тропарь храму, который в воскресные дни заменяется тропарем воскресным, в дни предпразднства и попразднства Господских праздников — тропарем предпразднства или праздника. За тропарем в честь Господа следует тропарь в честь Пречистой Матери Божией. Если храм Богородицы, то поется тропарь храма, если предпразднство или попразднство Богородичного праздника, то поется тропарь предпразднства или праздника. После тропаря в честь Матери Божией поется тропарь дня. За ним поется тропарь рядовому святому, память которого данного числа и месяца прославляется. Кондаки поются в той же последовательности, как и тропари, с тем различием, что они оканчиваются или, по выражению Типикона, "покрываются" Богородичным, глас 6: Предста́тельство христиа́н непосты́дное, / хода́тайство ко Творцу́ непрело́жное, / не пре́зри гре́шных моле́ний гла́сы, / но предвари́, я́ко Блага́я, на по́мощь нас, ве́рно зову́щих Ти: / ускори́ на моли́тву и потщи́ся на умоле́ние, // предста́тельствующи при́сно, Богоро́дице, чту́щих Тя.

Вместо этого Богородична, в храме, который посвящен Господу, поется кондак храма, равно и в храме, который посвящен Пресвятой Богородице, поется его кондак, в дни предпразднства или попразднства поется всегда кондак предпразднства или праздника.

Tрисвятое

Хор: Святы́й Бо́же, Святы́й Кре́пкий, Святы́й Безсме́ртный, поми́луй нас (трижды).

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в, Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Во дни Рождества Христова, Крещения Господня, неделю Пасхи и Святой Троицы вместо Трисвятого поется: Ели́цы во Христа́ крести́стеся,/ во Христа́ облеко́стеся./ Аллилу́иа (Гал. 3:26-27).

Апостол и Евангелие (зачало в Типиконе или в богослужебных книгах)

Прокимен: (здесь можно совершить каждение ручной кадильницей).

Чтец прокимен: Во́нмем. Прему́дрость. Проки́мен, глас седмы́й: Кня́зи лю́дстии собра́шася вку́пе на Го́спода и на Христа́ его́.

Хор повторяет прокимен: Кня́зи лю́дстии собра́шася вку́пе на Го́спода и на Христа́ его́.

Чтец читает стих: Вску́ю шата́шася язы́цы, и лю́дие поучи́шася тще́тным.

Хор опять повторяет прокимен.

Чтец читает первую часть прокимна: Кня́зи лю́дстии собра́шася вку́пе:

Хор повторяет вторую часть: на Го́спода и на Христа́ его́.

Если читается два Апостола и два Евангелия, то чтец вместо первой части основного прокимна возглашает: Ин проки́мем, глас... и читает второй прокимен дню.

Хор повторяет второй прокимен.

Чтец: К Кори́нфяном посла́ния свята́го апо́стола Па́вла чте́ние.

Чтец читает зачало 149: Бра́тие, аз бо прия́х от­ Го́спода, е́же и преда́х вам, я́ко Госпо́дь Иису́с в но́щь, в ню́же пре́дан быва́ше, прие́м хле́б, и благодари́в преломи́, и рече́: приими́те, яди́те, сие́ есть Те́ло Мое́, е́же за вы ломи́мо­е: сие́ твори́те в Мое́ воспомина́ние. Та́кожде и ча́шу по ве́чери, глаго́ля: сия́ ча́ша но́вый заве́т есть в Мо­е́й Кро́ви: сие́ твори́те, ели́жды а́ще пие́те, в Мое́ воспомина́ние. Ели́жды бо а́ще я́сте хлеб сей и ча́шу сию́ пие́те, смерть Госпо́дню воз­веща́ете, до́ндеже прии́детъ. Те́мже и́же а́ще ястъ хлеб сей или́ пие́т ча́шу Госпо́дню недосто́йне, пови́нен бу́детъ Те́лу и Кро́ви Госпо́дни. Да искуша́етъ же челове́к себе́, и та́ко от­ хле́ба да яст и от­ ча́ши да пие́т. Яды́й бо и пия́й недосто́йне, суд себе яст и пие́тъ, не разсужда́я Те́ла Госпо́дня. Сего́ ра́ди в вас мно́зи не́мощни и неду́жливи, и спя́т дово́лни. А́ще бо бы́хом себе́ разсужда́ли, не бы́хом осужде́ни бы́ли. Суди́ми же, от­ Го́спода наказу́емся, да не с ми́ром осу́димся.

Чтец читает первый аллилуарий: Премудрость, аллилу́иа, глас шесты́й: Блаже́н разумева́яй на ни́ща и убо́га, в день лют изба́вит его́ Госпо́дь.

Хор: Аллилу́иа (трижды).

Чтец читает стих второго аллилуария: Врази́ мои́ ре́ша мне зла́я: когда́ у́мрет и поги́бнет и́мя его́?

Хор: Аллилу́иа (трижды).

Чтец: Яды́й хле́бы моя́, возвели́чи на мя запина́ние.

Хор: Аллилу́иа (трижды).

Чтец: Прему́дрость, прости́, услы́шим свята́го Ева́нгелия.

Чтец: От Матфе́а (или от Марка, Луки, Иоанна) Свята́го Ева́нгелия чте́ние.

Хор: Сла́ва Тебе́, Го́споди, сла́ва Тебе́.

Предлагается читать по очереди 11 воскресных Евангелий: 1) Мф 28:16–20 (зач. 116); 2) Мк 16:1–8 (зач. 70); 3) Мк 16:9–20 (зач. 71); 4) Лк 24: 1–12 (зач. 112); 5) Лк 24:12–35 (зач. 113); 6) Лк 24: 36–53 (зач. 114); 7) Ин 20:1–10 (зач. 63); 8) Ин 20:11–18 (зач. 64); 9) Ин 20:19–31 (зач. 65); 10) Ин 21:1–14 (зач. 66); 11) Ин 21:15–25 (зач. 67).

Чтец читает 1-е Воскресное Евангелие: Во вре́мя о́но, единиина́десят ученицы́ идо́ша в Галиле́ю, в го́ру, а́може повеле́ им Иису́с. И ви́девше Его, поклони́шася Ему́: о́ви же усумне́шася. И присту́пль Иису́с, рече́ им, глаго́ля: даде́ся ми вся́ка власть на небеси́ и на земли́. Ше́дше научи́те вся язы́ки, крестя́ще их во и́мя Отца́ и Сы́на и Свята́го Ду́ха, уча́ще их блюсти́ вся, ели́ка запове́дах вам: и се, Аз с ва́ми есмь во вся дни до сконча́ния ве́ка. Ами́нь.

Если читается два Евангелия (второе Евангелие предлагается читать рядовое), чтец читает вслед за первым второе.

По окончании чтения хор: Сла́ва Тебе́, Го́споди, сла́ва Тебе́.

Хор: Воскресе́ние Христо́во ви́девше, / поклони́мся Свято́му Го́споду Иису́су, / еди́ному безгре́шному, / Кресту́ Твоему́ покланя́емся, Христе́, / и свято́е Воскресе́ние Твое́ поем и сла́вим: / Ты бо еси́ Бог наш, / ра́зве Тебе́ ино́го не зна́ем, / и́мя Твое́ имену́ем. / Прииди́те вси ве́рнии, / поклони́мся Свято́му Христо́ву Воскре́сению: / се бо прии́де Кресто́м ра́дость всему́ ми́ру. / Всегда́ благословя́ще Го́спода, / пое́м Воскресе́ние Его́: / распя́тие бо претерпе́в, / сме́ртию сме́рть разруши́.

Хор или чтец: Помяни́ нас, Го́споди, егда́ прии́деши во Ца́рствии Твое́м.

Помяни́ нас, Влады́ко, егда́ прии́деши во Ца́рствии Твое́м.

Помяни́ нас, Святы́й, егда́ прии́деши во Ца́рствии Твое́м.

Лик небе́сный пое́т Тя и глаго́лет: Свят, свят, свят, Госпо́дь Савао́ф, испо́лнь не́бо и земля́ сла́вы Твоея́.

Приступи́те к Нему́ и просвети́теся, и ли́ца ва́ша не постыдя́тся.

Лик небе́сный пое́т Тя и глаго́лет: Свят, свят, свят, Госпо́дь Савао́ф, испо́лнь не́бо и земля славы Твоея.

Сла́ва Отцу́, и Сы́ну, и Свято́му Ду́ху.

Лик святы́х а́нгел и арха́нгел и вся си́лы небе́сныя пое́т Тя и глаго́лет: Свят, свят, свят, Госпо́дь Савао́ф, испо́лнь не́бо и земля́ сла́вы Твоея́.

И ны́не, и при́сно, и во ве́ки веко́в. Ами́нь.

Лик святы́х а́нгел и арха́нгел и вся си́лы небе́сныя пое́т Тя и глаго́лет: Свят, свят, свят, Госпо́дь Савао́ф, испо́лнь не́бо и земля́ сла́вы Твоея́.

Херувимская песнь

(во время пения можно совершить каждение ручной кадильницей)

Хор поет протяжно: Иже херуви́мы та́йно образу́юще и Животворя́щей Тро́ице Трисвяту́ю пе́снь припева́юще, вся́кое ны́не жите́йское отложи́м попече́ние.

Яко да Царя́ все́х поды́мем, а́нгельскими неви́димо дориноси́ма чи́нми. Аллилу́иа, аллилу́иа, аллилу́иа.

Символ веры

Хор: Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же все́м и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, Иже от Отца́ рожде́ннаго пре́жде все́х ве́к. Све́та от све́та, Бо́га и́стинна от Бо́га и́стинна, рожде́нна, не сотворе́нна, единосу́щна Отцу́, Имже вся́ бы́ша. На́с ра́ди, челове́к, и на́шего ра́ди спасе́ния сше́дшаго с небе́с, и воплоти́вшагося от Ду́ха Свя́та и Мари́и Де́вы, и вочелове́чшася. Распя́таго же за ны́ при Понти́йстем Пила́те, И страда́вша, и погребе́нна. И воскре́сшаго в тре́тий де́нь по писа́нием. И возше́дшаго на небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода Животворя́щаго, Иже от Отца́ исходя́щаго, Иже со Отце́м и Сы́ном споклоня́ема и ссла́вима, глаго́лавшаго проро́ки. Во еди́ну Святу́ю Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.

Хор: Досто́йно е́сть, я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Прошения о усопших

Чтец: Помяни́, Го́споди, от жития́ сего́ отше́дшыя правове́рныя цари́ и цари́цы, благове́рныя кня́зи и княги́ни, святе́йшыя патриа́рхи, преосвяще́нныя митрополи́ты, архиепи́скопы и епи́скопы правосла́вныя, во иере́йстем же и в при́чте церко́внем, и мона́шестем чи́не Тебе́ послужи́вшыя, и в ве́чных Твои́х селе́ниих со святы́ми упоко́й.

Хор: Го́споди, поми́луй (трижды).

Чтец: Помяни́, Го́споди, ду́шы усо́пших рабо́в Твои́х, роди́телей на́ших и всех сро́дников по пло́ти: и прости́ их вся согреше́ния во́льная и нево́льная, да́руя им Ца́рствие и прича́стие ве́чных Твои́х благ и Твоея́ безконе́чныя и блаже́нныя жи́зни наслажде́ние.

Хор: Го́споди, поми́луй (трижды).

Чтец: Помяни́, Го́споди, и вся в наде́жди воскресе́ния и жи́зни ве́чныя усо́пшыя отцы́ и бра́тию на́шу, и сестры́ — зде лежа́щыя, и повсю́ду правосла́вныя христиа́ны, и со святы́ми Твои́ми, иде́же присеща́ет свет лица́ Твоего́, всели́, и нас поми́луй, я́ко благ и Человеколю́бец.

Хор: Го́споди, поми́луй (трижды).

Чтец: Пода́ждь, Го́споди, оставле́ние грехо́в усо́пшим рабо́м Твои́м (имена).

Хор: Го́споди, поми́луй (трижды).

Чтец: Пода́ждь, Го́споди, оставле́ние грехо́в всем пре́жде отше́дшым в ве́ре и наде́жди воскре́сения, отце́м, бра́тиям и сестра́м на́шым, и сотвори́ им ве́чную память.

Хор: Го́споди, поми́луй (трижды).

Прошения о живых

Чтец: Го́споди Иису́се Христе́, услы́ши смире́нное моле́ние на́ше, недосто́йных рабо́в Твои́х, Тебе́ за вся лю́ди Твоя́ принося́щих. И в пе́рвых помяни́ Це́рковь Твою́ Святу́ю, Собо́рную и Апо́стольскую, ю́же снабде́л еси́ честно́ю Твое́ю Кро́вию, и утверди́, и укрепи́, и разшири́, умно́жи, умири́, и непреобори́му а́довыми враты́ во ве́ки сохрани́: раздира́ния церкве́й утиши́, шата́ния язы́ческая угаси́, и ересе́й воста́ние ско́ро разори́ и искорени́, и в ничто́же си́лою Свята́го Твоего́ Ду́ха обрати́.

Хор: Го́споди, поми́луй (трижды).

Чтец: Спаси́, Го́споди, и поми́луй многострада́льное оте́чество на́ше и правосла́вныя лю́ди, во оте́честве и в разсе́янии су́щыя, страну́ сию́ и ве́рою и благоче́стием живу́щия в ней.

Хор: Го́споди, поми́луй (трижды).

Чтец: Спаси́, Го́споди, и поми́луй преосвяще́нныя митрополи́ты, архиепи́скопы и епи́скопы правосла́вныя, и весь свяще́ннический и мона́шеский чин и весь при́чет церко́вный, я́же поста́вил еси́ пасти́ слове́сное Твое́ ста́до, и моли́твами их поми́луй и спаси́ нас гре́шных.

Хор: Го́споди, поми́луй (трижды).

Чтец: Спаси́, Го́споди, и поми́луй оте́ц на́ших духо́вных и наста́вников в ве́ре, и их моли́твами прости́ на́ша согре́шения.

Хор: Го́споди, поми́луй (трижды).

Чтец:  Спаси́, Го́споди, и поми́луй роди́телей на́ших, бра́тию и сестры́, и сро́дники на́ша по пло́ти, и вся бли́жния ро́да на́шего, и дру́ги, и да́руй им ми́рная Твоя́ и преми́рная блага́я.

Хор: Го́споди, поми́луй (трижды).

Чтец:  Спаси́, Го́споди, и поми́луй рабов Твоих (имена).

Хор: Го́споди, поми́луй (трижды).

Чтец: Спаси́, Го́споди, и поми́луй ста́рцы и ю́ныя, ни́щыя, си́роты и вдови́цы, и су́щия в боле́зни и в печа́лех, беда́х же и скорбе́х, обстоя́ниих и плене́ниих, темни́цах же и заточе́ниих, изря́днее же в гоне́ниих Тебе́ ра́ди и Ве́ры Правосла́вныя, от язы́к безбо́жных, от отсту́пник и от еретико́в, су́щыя рабы́ Твоя́: и помяни́ их, посети́, укрепи́, уте́ши, и вско́ре си́лою Твое́ю осла́бу, свобо́ду и изба́ву им пода́ждь.

Хор: Го́споди, поми́луй (трижды).

Чтец: Спаси́, Го́споди, и поми́луй ненави́дящыя и оби́дящыя нас, и творя́щыя нам напа́сти, и не оста́ви их поги́бнути нас ра́ди гре́шных.

Хор: Го́споди, поми́луй (трижды).

Чтец: Явле́н буди́, Го́споди, бли́жним на́шим и сро́дником, отступи́вшим от Тебе́ и Тебе́ не и́щущим, вразуми́ я, на путь спасе́ния наста́ви и в Це́рковь Твою́ Святу́ю приведи́.

Хор: Го́споди, поми́луй (трижды).

Чтец: Отступи́вшыя от Правосла́вныя Ве́ры и поги́бельными ересьми́ ослепле́нныя, све́том Твоего́ позна́ния просвети́ и Святе́й Твое́й Апо́стольстей Собо́рней Це́ркви причти́.

Хор: Го́споди, поми́луй (трижды).

Хор: Отче наш, Иже еси́ на небесе́х! Да святи́тся и́мя Твое́, да прии́дет Ца́рствие Твое́. Да бу́дет во́ля Твоя́, я́ко на небеси́ и на земли́. Хлеб наш насу́щный да́ждь нам днесь. И оста́ви нам до́лги на́ша, я́коже и мы оставля́ем должнико́м на́шим. И не введи́ нас во искуше́ние, но изба́ви нас от лука́ваго. Аминь.

Хор: Го́споди, поми́луй (12).

Чтец: Влады́ко Бо́же Отче вседержи́телю, Го́споди Сы́не единоро́дный Иису́се Христе́, и святы́й Ду́ше, еди́но Божество́, еди́на Си́ла, поми́луй нас гре́шных; и и́миже ве́си судьба́ми, спаси́ нас недосто́йных рабо́в Твои́х: я́ко благослове́н еси́ во ве́ки веко́в, ами́нь.

Хор: Бу́ди и́мя Госпо́дне благослове́нно отны́не и до ве́ка (трижды).

Хор: Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в, ами́нь. Го́споди, поми́луй (трижды).

Псалом 33

Хор: Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи и возвеселя́тся./ Возвели́чите Го́спода со мно́ю/ и вознесе́м и́мя Его́ вку́пе./ Взыска́х Го́спода и услы́ша мя,/ и от все́х скорбе́й мои́х изба́ви мя./ Приступи́те к Нему́ и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от всех скорбе́й eго́ спасе́ и./ Ополчи́тся Ангел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь;/ блаже́н муж, и́же упова́ет Нань./ Бо́йтеся Го́спода, вси святи́и Его́,/ я́ко несть лише́ния боя́щымся Его́./ Бога́тии обнища́ша и взалка́ша,/ взыска́ющии же Го́спода не лиша́тся вся́каго бла́га./ Прииди́те, ча́да, послу́шайте мене́,/ стра́ху Госпо́дню научу́ вас./ Кто есть челове́к хотя́й живо́т,/ любя́й дни ви́дети бла́ги?/ Удержи́ язы́к твой от зла,/ и устне́ твои́, е́же не глаго́лати льсти./ Уклони́ся от зла, и сотвори́ бла́го./ Взыщи́ ми́ра, и пожени́ и./ Очи Госпо́дни на пра́ведныя,/ и у́ши Его́ в моли́тву их./ Лице́ же Госпо́дне на творя́щия зла́я,/ е́же потреби́ти от земли́ па́мять их./ Воззва́ша пра́веднии, и Госпо́дь услы́ша их,/ и от всех скорбе́й их изба́ви их./ Бли́з Госпо́дь сокруше́нных се́рдцем,/ и смире́нныя ду́хом спасе́т./ Мно́ги ско́рби пра́ведным,/ и от все́х их изба́вит я Госпо́дь./ Храни́т Госпо́дь вся ко́сти их,/ ни еди́на от них сокруши́тся./ Сме́рть гре́шников люта́,/ и ненави́дящии пра́веднаго прегреша́т./ Изба́вит Госпо́дь ду́шы раб Свои́х,/ и не прегреша́т вси, упова́ющии на Него́.

Хор: Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь. Го́споди, поми́луй (трижды)Го́споди, благослови́.

Чтец: Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас.

Хор: Ами́нь.

Хор: Правосла́вное епи́скопство гони́мыя Це́ркве Росси́йския,/ и Господи́на на́шего Высокопреосвяще́ннейшаго Митрополи́та (имя), / Первоиера́рха Ру́сския Зарубе́жныя Це́ркве,/ и господи́на на́шего Преосвяще́ннейшаго (имя Правящего архиерея), Епи́скопа (или Архиепи́скопа /титул Правящего архиерея/), / многострада́льную страну́ на́шу и вся правосла́вныя христиа́ны,// Го́споди, сохрани́ их на мно́гая ле́та.

Проповедь

Читается поучение из святых Отцов или авторитетного православного проповедника. После чего все прикладываются к Кресту, Евангелию и иконам.

После обедницы перед трапезой (или в начале самой трапезы) верующие могут потребить антидор или артос, запив их святой водой (агиасмой). Положив на блюдо раздробленный антидор или артос, каждый из присутствующих берет частицу сам и запивает святой водой. Перед потреблением чтец прочитывает молитву:

Го́споди Бо́же мой, да бу́дет дар Твой святы́й и свята́я Твоя́ вода́ в укрепле́ние душе́вных и теле́сных мои́х сил, во здра́вие души́ и те́ла моего, в покоре́ние страсте́й и не́мощей мои́х, в просвеще́ние ума́ моего́, по безпреде́льному милосе́рдию Твоему́ моли́твами Пречи́стыя Твоея́ Ма́тери и всех Святы́х Твои́х. Ами́нь.

По потреблении приступаем к общей трапезе.

Метки: рпцз

Печать E-mail

Для публикации комментариев необходимо стать зарегистрированным пользователем на сайте и войти в систему, используя закладку "Вход", находящуюся в правом верхнем углу страницы.

Интернет СОБОР
При использовании материалов сайта активная ссылка на http://internetsobor.org обязательна
© 2012 http://internetsobor.org Все права защищены

Find us on Google+

RizVN Login
Powered by Warp Theme Framework